Mit Platt in’n Mund un’n Grienen in’t Gesicht
-dat weer’n richtig dollt Fest!
An’n 1. April, kört vör de Oosterferien, hett uns plattdüütsche Leeswettstriet stattfunnen – un dat weer mal richtig wat Besünners! Bi de Klassenentschede hebbt 35 Kinner ut de Drütt- un Veertklass mitmaakt. De besten dree ut jede Klass sünd denn bi’n Schoolwettstriet an’n Start gahn un hebbt mit ehr Vörtregen de Jury in’t Hart treffen un to’n Lachen brocht.
In’t 3. Schooljohr sünd Clara Kröger, Tessa Rockmann un Lias Weiterer as Schoolsieger küürt worn. In’t 4. Schooljohr hebbt Jenke Hebener, Erik Döscher un Netis Hildebrandt dat beste Platt snackt. De Jury – mit Hilke Rümper, Christian Döscher un Martin Döscher – hett dat Leesen richtig geneten.
Een grooten Dank geiht an all de Öllern, Grootöllern un ok an Franziska Wigger, de de Kinner so fein op’n Wettstriet vörbereidt hett. Dank de Ünnerstütten vun de Weser-Elbe Sparkasse hebbt all Deelnehmers en verdeente Urkund un schicke Priese mit na Huus nehmen köönt.